“SHARQIY YEVROPA, MARKAZIY OSIYO VA KAVKAZ MAMLAKATLARI SANOAT KASABA UYUSHMALARINING TAJRIBA ALMASHISHI” MAVZUSIDAGI XALQARO SEMINAR KASABA UYUSHMASI FAOLLARI UCHUN NATIJALARGA BOY BOʻLDI

Oʻzbekiston kasaba uyushmalari Federatsiyasining Malaka oshirish institutida “Sharqiy Yevropa, Markaziy Osiyo va Kavkaz mamlakatlari sanoat kasaba uyushmalarining tajriba almashishi” mavzusida xalqaro seminar tashkil etildi.

Seminar Oʻzbekiston kasaba uyushmalari Federatsiyasi, Xalqaro mehnat tashkilotining Mehnatkashlar faoliyati boʻyicha byurosi (ASTRAV) va  IndustriALL Global ittifoqi tashabbusi bilan Oʻzbekiston kimyo va farmatsevtika sanoati xodimlari kasaba uyushmasi boshchiligida hamkor tashkilotalar Energetika, neft-gaz  va geologiya xodimlari kasaba uyushmasi Respublika kengashi, Metallurgiya va mashinasozlik sanoati xodimlari kasaba uyushmasi Respublika kengashi, “Olmaliq kon-metallurgiya kombinati” AJ xodimlari kasaba uyushmasi kengashi va “Navoiy kon-metallurgiya kombinati” AJ xodimlari kasaba uyushmasi kengashlari tomonidan tashkil etildi.

Seminarda Oʻzbekiston kasaba uyushmalari Federatsiyasi, vazirlik va idoralar, Turkiya, Qozogʻiston, Tojikiston delegatsiyalari, Respublika kengashlari mutaxassislari va boshlangʻich kasaba uyushmalari tashkilotlari vakillari  ishtirok etdilar.

Yigʻilishda Oʻzbekiston kasaba uyushmalari Federatsiyasi raisining oʻrinbosari Baxtiyor Maxmadaliyev hamda Oʻzbekiston kimyo va farmatsevtika sanoati xodimlari kasaba uyushmasi Respublika kengashi raisi Nigora Alimdjonova soʻzga chiqib kasaba uyushmalari faoliyati samaradorligini yanada oshirish yuzasidan gapirib, xalqaro seminar ishiga omad tiladilar.

Seminar davomida ishtirokchilar IndustriALL Global ittifoqi (Global ittifoqi Bosh kotibi oʻrinbosari Kemal Ozkan), Turkiya, Qozogʻiston, Tojikiston davlatlarining turdosh kasaba uyushmalari faoliyati bilan yaqindan tanishdilar.

Shuningdek, tadbir davomida jamoa shartnomalaridagi imtiyozlar, kasaba uyushma aʼzolarining ijtimoiy-huquqiy himoyasi hamda xodimlarga qulay mehnat sharoitlarini yaratishga doir masalalar toʻxtalib oʻtildi.

Mutaxassislarning taʼkidlashicha, bugungi kunda kasaba uyushmalari ish beruvchilar va xodimlar oʻrtasidagi ijtimoiy-mehnat munosabatlarini tartibga solishda muhim oʻrin tutmoqda. Ular xodimlarni shaxsiy va jamoaviy, ijtimoiy, mehnat, kasbiy huquq va manfaatlarini himoya qilishda salmoqli ishlarni amalga oshirmoqdalar.

Ishtirokchilar seminar yakunida tashkilotchilarga oʻzaro fikrlashish va tajriba almashish, sohaga oid masalalar va muammolar haqida batafsil suhbatlashish va ularni hal etish yoʻllarini belgilab olish uchun seminarni aʼlo darajada tashkil etganliklari uchun oʻz minnatdorchiliklarini bildirdilar.