“AMMOFOS-MAXAM” AJ KASABA UYUSHMASI QOʻMITASINING HISOBOT-SAYLOV KONFERENSIYASI BOʻLIB OʻTDI

Oʻzbekiston kimyo va farmatsevtika sanoati xodimlari kasaba uyushmasi tizimidagi “Ammofos-Maxam” aksiyadorlik jamiyati kasaba uyushmasi tashkilotining hisobot-saylov konferensiyasi boʻlib oʻtdi.

Kimyo va farmatsevtika sanoati xodimlari kasaba uyushmasi Respublika kengashi raisi Nigora Alimdjanova korxonada “Yashil makon” umummilliy loyihasi doirasida tashkil etilgan daraxt ekish marosimida ishtirok etdi. Shundan soʻng korxonada tashkil etilgan koʻrgazmada boʻlib, tadqiqot ishi olib borayotgan yosh xodimlar va boʻsh vaqtlarida hunarmandchilik bilan shugʻillanayotgan xotin-qizlar bilan suhbatlashib, ularning taklif va mulohazalari bilan yaqindan tanishdi.

Shundan soʻng “Ammofos-Maxam” AJ kasaba uyushmasi qoʻmitasining hisobot-saylov konferensiyasi oʻz ishini boshladi. Unda “Ammofos-Maxam” AJ boshqaruvi raisi Iskandar Umarov, tarmoq Respublika kengashi raisi Nigora Alimdjanova, Respublika kengashi raisi oʻrinbosari Ibrohim Isoqov, korxona kasaba uyushmasi qoʻmitasi raisi Qudratjon Rahimov va ishlab chiqarish sexlaridan saylangan delegatlar ishtirok etdilar.

Konferensiya davomida tashkilotning 2020-2025-yillardagi faoliyati yuzasidan ish beruvchi, kasaba uyushmasi qoʻmitasi raisi va taftish komissiyasining hisobotlari eshitildi va faoliyat yuzasidan muhokama qilindi.

Delegatlar tomonidan kasaba uyushmasi qoʻmitasining hisobot davridagi faoliyati “qoniqarli” deb baholandi va taftish komissiyasining hisoboti tasdiqlandi.

Konferensiya kun tartibiga koʻra tashkiliy masala koʻrildi. “Ammofos-Maxam” AJ kasaba uyushmasi qoʻmitasining amaldagi raisi Q.Rahimov kelgusida boshqa lavozimda faoliyat yuritishi munosabati bilan oʻz nomzodini kasaba uyushmasi qoʻmitasi raisligiga qoʻymasligini bildirdi.

Saylov yashirin ovoz berish yoʻli bilan muqobillik asosida delegatlar tomonidan koʻrsatilgan nomzodlar ishtirokida oʻtkazildi va yakuniy natijalarga koʻra “Ammofos-Maxam” AJ kasaba uyushmasi qoʻmitasi raisi etib koʻpchilik ovoz bilan Usmanova Muhabbat Karimovna saylandi. Shuningdek, kasaba uyushmasi qoʻmitasining tarkibi, taftish komissiyasi tarkibi hamda Kimyo va farmatsevtika sanoati xodimlari kasaba uyushmasi Respublika kengashining IV Qurultoyiga delegatlar saylab olindi.

Konferensiya yakunida tarmoq kasaba uyushmasi Respublika kengashi raisi Nigora Alimdjanova soʻzga chiqdi. U kasaba uyushmasi qoʻmitasining sobiq raisi Qudratjon Rahimovni kasaba uyushmalarida yuritgan faoliyatini yuqori baholab, unga Respublika kengashi nomidan tashakkurnoma va esdalik sovgʻasini topshirdi.

Nigora Alimdjanova Oʻzbekiston kasaba uyushmalari Federatsiyasi va tarmoq kasaba uyushmasi Respublika kengashining bugungi faoliyati va joriy yilda Oʻzbekiston kasaba uyushmalari harakatining 120-yilligi keng nishonlanishi toʻgʻrisida gapirib oʻtdi.

Delegatlar tomonidan bildirilgan fikr-mulohaza va takliflarni inobatga olgan holda kelgusidagi faoliyat yuzasidan ustuvor vazifalar belgilab olindi.